Nagapangatubang sa kaso nga robbery kag frustrated homicide ang anay kolektor nga ginatudlo nanghold-up sa isa ka bangko sa San Miguel, Jordan Guimaras, Myerkules sang hapon.

Positibo nga ginatudlo sang mga empleyado sang Lifebank Foundation Incorporated ang suspek nga si Arlen Cerbas.

Nahibaluan nga gintuyu kuntani sang suspek nga i-holdup ang mga empleyado sang nasambit nga bangko. Pagkatapos nga gingapos ang mga empleyado, ginbunu naman sini ang operations manager nga si Edwin Constantino sa nagkalain-lain nga parte sang iya lawas.

Nakuha sang suspek ang P34,000 nga kwarta kag mga cellphone sang mga biktima.

Gilayun ini nga nagpalagyo apang nadakpan man gilayun sang mga katapo sang Jordan Police Station.* KVB